Uit menige mense se mislukte liefdes verhoudings asook my eie, vra ek myself af, of mense-en ek, ooit weet wat liefde regtig is. Verstaan ons ooit wat dit regtig is? Is dit ‘n gevoel of emosie? Is dit ‘n besluit? Kan mens dit meet aan ‘n kriteria?

Ek weet daar is verskillende soorte liefde, daarvan kan almal getuig. Liefde vir iets heerlik soos die koek in hierdie foto hierbo, of koffie, soos in ‘n vorige blog, broederlike liefde, minnaar, vriende liefde, jou liefde vir kinders/familie/diere/God…

En soos wat ek meer en meer daaroor mymer, hoe meer besef ek in watter groot mate ek geseen is. Ek kyk terug op my lewe en weet ek is uitsonderlik geseen met die liefde.

Vandag wil ek effens uitbrei oor liefde vir mense wat jy nie ken nie. Jip, ek het nooit geweet dit is moontlik nie. Ek is regtig regtig geseend met goeie ordentlike, wonderlike vriende en veral in hierdie stadium van my lewe is elkeen van hulle goud werd. Elkeen bring iets uniek in my lewe en ek is diep dankbaar vir elkeen in my lewe. Die Wilmien, Therese, Una, Karien, Katy, Angeline, Riana, Lucia, Anette, Marinda’s in my lewe.

Dan het ek ‘n groep mense wat vrinne (let op die spelling) geword het nog voor ek hulle ontmoet het. Ek het soos ek meer oor en by elkeen gelees het gevoel hoe ek lief word vir hulle. En soms gewonder hoe is dit moontlik, om iemand lief te hê wat jy nie eintlik ken nie. Ek het myself gevra: “Is dit real?” Wel, Saterdag kon ek dit realness daarvan toets….

Ek het die voorreg gehad om 3 van my blogmaats te ontmoet!!! Woordnoot, Tannie Frannie en Positief!

Una, wat ek wel geken het en lankal lief gekry het, was ook daar. Ons het heerlik gekuier.

Dit was heerlik om die gesiggies agter die name te leer ken. Dit het my ook natuurlik lekker laat giggel as ek terug dink aan die kommentare en stories wat ek gelees het en om dit by die gesiggies te plaas. Veral Tannie Frannie en al haar manewales op die groen bus en Magriet versus Magrieta waar sy die arme kat laat vrek… (dis glad nie hoe sy is nie) Ek wens ek kan al die ander ook ontmoet!! Ek kon die “liefde” wat ek vir my blogmaats voel, toets en weet dis eg en dis reg….

Dit het my laat dink aan die gesegde wat ek lank terug gehoor het; “a stranger is just a friend you have not met”…En ek sien uit na al die liefdes wat ek nog gaan ontdek…

Wat Saterdag nog meer besonders gemaak het, was dat ek na die kuier saam met my nuwe vriende (new members soos Woordnoot dit stel), saam kon kuier met ‘n groepie van my “ou” vriende. Ek kon my liefde vir my mense, my vel-mense, raakvat mense, kon ek opslurp saam met die liefde vir my nuwe vrinne. Dit het my lyf kom vol sit, my mens spens kom vol maak. En dis dit wat my bybly terwyl ek ‘n nuwe week vol onbekendhede aanpak. Die liefde……