Die woord is ‘n vloekwoord wat die meeste mense vermy terwyl die statistiek verbysterend is. Asof om nie daaroor te praat nie, alles sal beter maak. Vandag gaan ek my groot dogtertjie klere aantrek en daaroor begin praat. Want mense moet hoor. Dalk moet ek hierdie ook ‘n reeks maak want ek het nogal baie ondervinding en baie om te sê hieroor. Nee, ek is nie trots hieroor nie, in teendeel. Die vidio wat ek hierby insluit is ‘n absolute moet kyk vir elke geskeide persoon, elkeen wat weer getrou het,elkeen wat iemand ken wat daardeur gaan en elkeen wat mense bepraat wat deur egskeiding is. Beraders, pastore en dominies kan regtig ook hieruit leer.
Wat meeste mense nie sal erken nie, is dat feitlik almal op een of ander stadium oorweeg om jou eens geliefde ander helfde,  ‘n skop onder die jack te gee. Hetsy ligtelike oorweging of ernstig bedoel. In gesprekke het ek al gehoor;” ek was so kwaad vir hom/ haar ek skei sommer.”  Net om dan te sê, nee al was ek so kwaad sal ek nooit skei nie.  Asof dit die ultimate sonde is. Want kom ons wees eerlik, mense wat skei makeer mos iets!? Nê? Veral goeie gawe Christene beoordeel en veroordeel geskeides asof dit die grootste aardsonde is wat gepleeg kan word. Kom ek vertel jou vandag uit eie persoonlike ondervinding.

Niemand trou ooit met die gedagte dat jy gaan skei nie. Dis mos happily ever after! Jy glo julle is lief vir mekaar en bedoel vir mekaar. Julle glo dit gaan vir altyd wees. As daar probleme opduik werk jy dapper daardeur. Soms nie so dapper dalk eder in angs en bewing.Vra raad waar nodig of moontlik.  Soms bly jy stil, vertel niemand.  Want jy is skaam en seer. Omdat jy swaar genoeg kry en nie nog boonop veroordeeling ook kan hanteer nie, dra jy in stilte aan ‘n las, te groot om te dra. As dit ernstig raak en jy besef jy het hulp nodig,  gaan sien jy beraders.  Mens gee nie net op nie. Mens skei nie net sommer nie.
Hoe vertel jy vir mense dat jy ingeruil word vir ‘n jonger model? Of dat jy mishandel word? Dat jou menslikheid van jou gestroop word soos mens die blare van ‘n mieliestronk af trek? Hoe vertel jy dat alkohol misbruik jou wederhelfde verander en jou laat les opsê sonder dat jy hom blootstel en dinge erger maak? Hoe beskerm jy jou dogtertjies teen die verwerping, die skinder, die wreedheid van mense se praat? Hoe verduidelik jy dat tenspyte van jou eie gebreke en tekortkominge, jy regtig, regtig probeer met alles in jou. Hoe verduidelik jy dat as jy alles, alles gegee het en steeds faal, jy met geen ander keuse gelaat word as om weg te stap? Hoe verduideliking jy dat jy enige iets sal gee of probeer om dit te maak werk maar dat jy bietjie vir bietjie weg draai as die liggies in jou dogtertjies se ogies dowwer word. En jy alle moed verloor om heel, menswaardig of gelukkig saam met iemand te wees.
Hoe vertel jy mense dat jy vanuit jou eie onverwerkte sere van die verlede, nie altyd die regte antwoord het of altyd weet hoe om reg op te tree nie en sodoende ook bydrae tot ‘n groot fiasko?

Jy weet nie. Jy praat nie. Jy bly stil en jy vat die pakslae. Jy bid. Jy staan stadig maar seker moeisaam op, trek jouself bymekaar en gaan aan. Jy maak seker jou kiddies is oky. Word heel en gebalanseerde grootmense sovêr dit in jou vermoë is. Jy vat wat mense uitdeel, beskerm jou krose en werk aan jou genesing. Miskien dan, eendag kan jy regop staan, kop omhoog en sê ek is weer heel. Alles het ten goede mee gewerk.




Watch “The Sermon on the Mount: Murder, Adultery, Divorce” on YouTube